Biatak (The Truth)!!!!

Thawngzamhbu nih ca in siseh, muicawl le aw in siseh an zamhmi thawngpang(news) khi a tlangpi in biahman(biatak phunkhat) ah ka rak ruah. "Media nihcun thil pakhat a cangmi kha mizei hmanh duhdanhnak ngei loin a sining bak tein an chimphuan awk a si" timi tleihtleng khi ka rak zumh ngai."Thawngzamhtu(journalists) nihcun thawngpang poahpoah cu zumhtlakmi hrihram(source) hmangin fehternak an tuah hnu ah anmah hmuhning le ruahning tel loin a dikning tein an tial awk a si___objectivity" timi thawngzamhtu zulhphung zong khi ka lung a rak hring tuk bal lem lo. Mi tampi nih zumhmi thawngzamhbu nih an thanhmi thawngpang poahpoah cu lunghngiarnak um loin biahman ah ka rak cohlan khawh peng. Biadang in chim ahcun "thawngpang timi cu thil pakhat a cangmi kha a sining tein kap ngeilo thawngzamhtu cafung/bia hmang in thlalang chung ah ka hei zoh" ti phun dengdeng khin ka rak ruah. Cu ti cun, thawngpang phunkip cu ka rak rel lilhlalh ve i ka rak zumh diahmah ko.

Ka Ruat Tawn.....

"Mirang mino pawl hi pumh an hmang lo, biakinn mui hrimhrim hi an hmu huam lo, Clubs le nuamhnak hmun lawngte ah an caan an hman dih....Hi nih hin an tlau bak ko ti a langhter ko" tiah Laimi tampi nih kan soisel tawn hna. Soisel zong cu an tlak taktak. Ninga Ni zaanlei hrawnghrang poah cun zeidang tuak loin "Party" tibantuk rumro cu an i buaipi hrim. Laimi he cun kan idang ngaingai i lunglawmh awk ngai a si ko. Asinain, Laimi mino tam-u nih Pathian thangthatnak biakinn kan kal tik ah kan umtuning ka zoh ve lengmang ah aa pum lomi he kan idannak a um tuk lo___kan thutnak hmun dah ti lo. Kan hnuzarh Pathian Ni pumhnak ah ka zirlei ka zoh, tlangvalno panga hrawng nih an zapi tein an phone an ichuah i game an i celh. Ka hnulei tlang ka van zoh than. A thumi tlangval pathum ning tein an lu an khun i an phone an bih viar ve thiam___ka zoh hna le zoh hna lo hmanh an thei lo. Ka hmai tlang ka bih than, nungak pawl zong an si ve thiamthiam.

Tuni hi Iran Kumthar Ni (Nowruz) a si...

Ihkhun cung kai hlan deuh ah innrangpi maivan ka bih ta. Obama nih Iran mipi sin ah "Eid-eh Shoma Mobarak" tiin Kumthar Lawmhnak bia a chimmi video ka hmuh i vikvak in ka on colh. Ka van ngaih cu remnak serding in sawmnak biathlum lawngte!!!!

Zeitindah Putin hi Reem ah a t'hat bik lai?

Crimea cu Ukraine ramt'hen a si ti lo, Russia Federation a si cang

March,16, 2014 ah tuahmi referendum ah Crimea mipi 97% dengmang nih Russia Federation ah ikomh ding in an lungtlinnak an langhtermi cu Putin nih lunglawm tein a cohlan. Referendum cu mipi kha duhthimnak nawl pek a si ko caah thiltha ngai a si ko. Sihmanhsehlaw, Putin nih Crimea ah a tuahtermi hna referendum cu duh a nung lo tuk. Crimea cu Ukraine ram pumpi cozah nih amah tein uknak nawl a pekmi ramt'hen sawhsawh a si  tikah Ukraine ramkomh phunghrampi nih anmah nawl lawng in inndang chuahnak nawl a pe hna lo___Ukraine phunghrampi ah ramthen pakhat khat nih inndang chuah a duh sual a si ahcun ram pumpi mipi nih duhthimnak vote an thlak hmasa lai, ti a um. Cucu, Russia nih a thei cuahmah ko nain buar ding in a forh hna. "Ukraine nih Nuclear a serlo ahcun ralkap le hriamnam hmang in ka namneet hrimhrim lai lo" tiah 1994 lio ah Russia nih Ukraine le US he biakamnak minthut an rak sermi, Budapest Memorandum zong a buar fawn. Cu hlei ah, Crimean nih atu duhthimnak an tuah lio ah hin Russia ralkap cu Crimea ah an khat thup ko. Phundang in chim ahcun, Crimean nih meithal par in hmuahchih bu dengmang in "Russia maw na duh deuh, Ukraine" timi duhthimnak vote an thla. Mah cu result cu Russia Paliament, Lower House(Duma) le Upper House(Federation Council) nih tuzarh nili ni le ninga ni ah lungtling taktakin an cohlan caah Putin nih "Crimea cu Russia Federation pakhat a si cang" tiah fehternak minsen a thut.

A Mak Bik Ka Timi "Proposal" Pahnih....

Mirang le Laimi hi kan ilo lo ngai___mirang ka ti tikah Mirang Ram i khua a sami Minak zong ka telh chih hna hi awh. An cawlcanghning le kan cawlcanghning aa dang bak. Kannih cu kan duhmi thil cungah kan ivelhuai theu. Annih cu an tuah duhmi cu zeidang tampi tuak tuk loin an tuah mei ko. An sunghsakmi zong an thup lo, an langhter bak. An upatmi zong thangthatnak an pek bak hna. An duh lomi zong raltha takin an chim ko. "Mihmai ah zoh a chia ee, cu ee, kha ee" an ti lo.

Vawleicung Sianginn Nganbik: Khan Academy

Aluancia kum 2009 lio ah khan Boston khua ah Hedge Fund Analyst rian a tuanmi, Salman Khan (Bollywood Fitlaw a si lo) nih a e-mail ah a theih bal lomi mino pakhat sin in lunglawmhnak cakuat a hmuh. "Tukum thal sianginn khar chung vialte, na Youtube ah ka caan ka hmang, kanan a rak thiam lo taktakmi ka si nain atu cu ka duhmi college nih an ka cohlan cang, sianginn luhnak ding caah phitmi kanan test ah mark tha taktak ka hmuh, cucu na tuahmi thil khuaruahhar ruang ah a si, kai lawm tuk, kei le ka innchungkhar nunnak cu nangmah nih na kan thlen ko....Kan innchungkhar ning in na caah nifatin thla kan in campiak zungzal," timi lawmhnak  bia a si.

Tutan Ka Innrin Ni

Tuni cu Laikhal holh cun Innrin Ni a si. Zingka tuan nawn tein ka thawh hnu ah rian herh tete ka tuah i chun lai hlan deuh ah kai lim. Cun, Computer in Pumpululh chuih zoh hram ka thok. Kai nuamh tuknak ah rawl hmanh thathi in ka ei lo. Zanlei pali tiang bakte din loin ka zoh___Premier League le Laliga he kaa meh. An idinh caan zong ah "Footyroom" in an chuihciami pawl highlight ka zoh thiamthiam. Aston Villa nih thihngamh in ka tanhmi Chelsea cu kawl 1-0 in an tei hna caah ka lung a rawk ngai. Ka thin zong a hang__referee nih a tlaklo tukmi palhnak ruang ah Willian cu Red Card in a chuah caah.

Obamacare sawknak bawmtu le "Expanded Medicaid" kong tlawmpalte

Keimah pumpak blog le Global Chin News ah "Zeiruang Ah Obamacare ka uar?" timi tlangtar in USA ah khua a sami poah nih theihlo awk a tha lomi, ngandamnak aamahkhan upadi (Healthcare Law) kong ka tialmi cu minung tamngai nih nan rel caah kai lawm ngaingai. Ka blog ah siseh, keimah pumpak mail ah siseh, comment zong tam ngaite ka hmu. Fian lomi halnak tete zong a um pah i a cawknak kong he aa pehtlaimi a tam bik caah tlawmpal in ka van thai than. Cun, US cozah nih caan saupi an ngeih cangmi,sifakmi ngandamnak aamahkhan peknak program, Medicaid kha Obamacare tiah kan auhmi "Affordable Care Act" nih a ri a kauh(expand) deuh. Mah cu kong zong cu theih tha a si lai tiah ka ruah caah ka van thai chap ve.

Malaysian an inawicawt, Tuluk an sivang, Kannih kan Zo a lang ve

Kan hnu zarh niruk ni ah Malaysia in Beijing lei ah aa thawhmi vanlawng, Malaysia Airlines Flight No.370 cu a tlaunak in atutiang hmuh a si rih lo. Tuluk nih zarhpi ni ah a cutuh(satellite) in a tlaknak rili ah an ruahmi hmun hrawnghrang cung ah zeimaw hnawm nganpi pathum kan hmuh tiah Satellite hmantlak an thlah. Cucu, tuanvo ngeitu hna nih an zohfel cuahmah lio pi a si tiah CNN nih an thanh cuahmah. Nain, Malaysia cozah vanzuang lei tawlreltu hruaitu nih "Tuluk cozah sin in zeibantuk thawngpang le hmantlak hmanh kan hmu rih lo" tiah a chim tiah an van thanh chih hoi. A buai thlak rumro. Khuaruahhar zong a si. Thlapa cung hmanh ah duhtawk in a kai kho cang i vawlei pumpi zong mitt'hep ah a hrawk kho dingmi bomb hmanh tampi a ser kho cangmi minung nih vanlawng nganpi bak ninga chung reru pi an kawl cang nain hmuh khawhlo ko cu! Pathian thilser a rak mak ning hi dah___minung theihkhawh ci a rak si rumro rua lo.

Dr. Bob Moorehead Roling Bia..

Important Note: A tanglei cabia hi "Tleicia Nihchuak Chimthiam, George Carlin Biacah" timi tlangtar in March 10, 2014 ah Laica in ka rak leh bal. Cucu, a rak palh! Amak tukmi cabia a t'ial(chim) hmasa biktu hi tleicia capo chimthiam George Carlin a rak si lo. Washington State, Richmond khua ah a ummi Overlake Christian Church ah Pastor a t'uanmi Dr Bob Moorehead nih a rak chimmi roling bia a si. Keimah lawng aa palhmi ka si lo. Minung tampi nih an i palh ve i Dr. Bob Moorehead kha credit pe loin George Carlin le Dalai Lama tu kha thangt'hatnak an pek tawn hna. Cucaah, a tlangpi le a hmantlak ka van thlen. A tanglei ah George Carlin muicawl ka tarmi tu khi cu ka uar tuk ve le ka hlonh siang deuh lo.

 



Vawlei tuanbia ah atu kan chan nih a t'ialmi taktak cu hihi a si. Voidang nak in inn sang deuhmi kan ngei nain kan thin a tawi deuh. Kan zalam an kau deuh nain kan khuaruahning a bi deuh. Tam deuh kan hmang i tlawm deuh kan ngei. Tam deuh kan cawk nain tlawm deuh kan ilawm. Run-inn ngan deuh kan ngei nain kan innchungkhar an fa deuh. Nuamhnak thilri tam deuh kan ngei nain kan inuamh caan a zor.

Putin le Ukraine Cawnpiaknak Asiloah Zeiruang ah Putin nih Obama Bia A Lak Lo?

Luhak Putin nih nizan ah Ukraine ram buainak ah ralkap hmang in aa thlaknak kong he pehtlaiin thawngfianhnak a tuah. "Crimea ramthen chung ah daihnak a len i ningcang tein thil a kal khawhnak ding caah anmah hruaitu le mipi bawmhhalnak aw ngai in ralkap kan thlahmi a si ko" tiah a nolh rih ko nain Kiev lei ah ralkap lanhter ding in aa timhlonak kong a chim chih. "Ukraine khuapi Kiev lei ah ralkap kalter an hau rih lem lo tiah kan ruah ko" tiah a chim chihmi nih a thin aa dawmhmi vawleicung hruaitu pawl, chikkhat an thawpi chuah caan a pek hna kan ti ko lai.

Ukraine Buainak Puanzar Phen Ah A Rak Ithupmi Cold War A Lang Thluahmah Cang

Ukraine cozahpi tang ah amah tein aa ukmi Crimea tikulh ah Russia ralkap 15000 an um cang i vanlawng bual le cozah zung ngan deuhdeuh cu anmah nawlngeihnak tang ah an um cang tiah CNN nih thawng an thanh cuahmah lio a si. Russia President Putin nih Ukraine buainak ah a herh ahcun ralkap thazang hmang in ithlaknak nawl pek ding in Russia paliament ah a halmi cu "Amen" a hmuh caah fiang puut in a cawlcanghnak a van langhmi khi a si ko. A ngaingai tiah cun Paliament ah nawl a hal hlan in an hmai aa hupmi Russia ralkap nih Crimea ramthen cozah cu an lak diam cang tiah an ruah. Feb 27,2014 zaan ah a mui aa langhter lomi ralkap nih Crimea ramthen paliament innpi cu an luhhnawh diam cang timi cu Reuters nih an tarmi mahhi CCTV Video nih fiang tein a langhter. Meithal aa kenmi pawl nih an hmanmi motors i license plates khi Ukraine cozah nih an chuahmi araangmi si loin anakmi a si hlei ah Russia holh in an holh caah Russia ralkap an si ko tiah an ruah.